Llyfrau llafar Cymraeg ar ffonau clyfar am y tro cyntaf

02/03/2021

Categori: Ar-lein, Iaith, Llenyddiaeth, Newyddion

Am y tro cyntaf mae modd gwrando ar ddetholiad lyfrau Cymraeg ar apiau Audible ac iTunes wrth i Wasg Y Lolfa ryddhau dwsin o lyfrau amrywiol Cymraeg y gellir eu mwynhau heb orfod agor llyfr na phrynu CD.

Mae’r chwyldro ym mhoblogrwydd ffonau clyfar wedi arwain at dwf aruthrol yng ngwerthiant llyfrau llafar electronig drwy’r byd, ond hyd yn hyn araf bu’r ymateb yn Gymraeg.

 
Dywedodd Garmon Gruffudd ar ran Y Lolfa: “Fel gwasg rydym wedi bod yn ymwybodol iawn o’r ddiffyg darpariaeth o lyfrau llafar Cymraeg ar Audible ac iTunes ers tro ac o’r diwedd rydym wedi mynd ati i drio gwneud iawn am hyn. Am sawl rheswm gall gwrando ar lyfr fod yn brofiad mwy dymunol i rai na darllen llyfr. Yn un peth dwi’n credu bod pobl am orffwys eu llygaid ar ôl bod yn llygadrythu ar sgriniau drwy’r dydd. Ein bwriad yw cyhoeddi rhagor o lyfrau llafar dros y misoedd a’r blynyddoedd i ddod.”
 
Mae’r datblygiad yma yna dilyn cyhoeddi’r cofiant Cymraeg cyntaf ar lwyfan Audible fis Tachwedd llynedd, sef hunangofiant yr arloeswr Huw Jones, sef Dwi isio bod yn... a recordiwyd yn arbennig ar gyfer y pwrpas yn addas iawn yn stiwdio Sain, sef un o’r cwmnïau a sefydlwyd gan Huw Jones. Recordiwyd nifer eraill o’r llyfrau gan Gymdeithas y Deillion Gogledd Cymru ac addaswyd rhai o CDau sydd eisoes ar gael.

 

Datblygu'r ddarpariaeth ymhellach

 

Dywedodd Arwel Jones, Pennaeth Datblygu Cyhoeddi Cyngor Llyfrau Cymru: “Rydym yn croesawu penderfyniad Y Lolfa i gyhoeddi amrywiaeth o lyfrau llafar newydd ac yn falch o gefnogi’r fenter. Mae’n hynod bwysig sicrhau bod gan ddarllenwyr Cymraeg ddewis da o fformatau gwahanol ac fel Cyngor Llyfrau rydym yn awyddus i weithio gyda phartneriaid ar draws Cymru er mwyn datblygu’r ddarpariaeth ymhellach.”

 

Ymhlith y llyfrau llafar Cymraeg sydd ar Audible ac iTunes mae Llyfr Glas Nebo (Manon Steffan Ros), I Botany Bay (Bethan Gwanas), Gwreiddyn (Caryl Lewis), Pantywennol (Ruth Richards) ac Ymbelydredd (Guto Dafydd).