“Tydi Taid ddim yma mwyach – ond, yng nghistiau'r atig, mae ei straeon yno'n disgwyl i gael eu darganfod.”

Wrth i'r plant gyrraedd y neuadd yn eu gwisgoedd Calangaea, mae troliau sioe bypedau symudol Taid yn troi'n ffair o fynwentydd dychrynllyd, cysgodion iasoer a chypyrddau o ysbrydion swnllyd; a'r plant yn setlo i wrando ar stori o'r enw... DYGWYL Y MEIRW!

Sioe i blant yw DYGWYL Y MEIRW sy’n ddathliad o chwedlau ein hynafiaid, o gylch bywyd, ac o sut mae hogan fach yn dod i delerau a marwolaeth ei Thaid. Drwy gymeriadau traddodiadol Cymreig fel yr Hwch Ddu Gota, y Ladi Wen a Jac y Lantarn, mae Gwen yn darganfod bywyd newydd yn straeon ei Thaid, a dyfodol fel storiwr ei hun. Drwy fiwsig, hiwmor, goleuadau iasoer, triciau theatrig, pypedau cysgod ac ysbrydion hedegog, mae'r sioe yn gorffen ar nodyn hapus, gobeithiol.

Sioe yn yr iaith Gymraeg